“Qafqaz Konserv Zavodu” – Aqrar istehsalı stimullaşdıran bir emal müəssisəsidir
Bu günlərdə İqtisadçılar İttifaqının “İqtisadiyyat” qəzetinin “Regionların tarazlı inkişafı – 5 il Xaçmaz” başlığı altında xüsusi buraxılışı işıq üzü görmüşdür. Ziyad Səmədzadənin rəhbərliyi ilə həyata keçirilən layihədə Xaçmaz rayonunun son 5 illik nailiyyətləri, yüksək göstəriciləri və inkişafa doğru atılan addımları qeyd edilmişdir. Möhtərəm prezidentimiz İlham Əliyevin “Rayonları inkişaf etdirməsək, uğur əldə edə bilməyəcəyik” cümləsi ilə başlayan jurnalda “Qafqaz Konserv Zavodu” MMC-yə də yer ayrılmışdır (səh. 59-60). Müəssisənin fəaliyyətini əhatə edən bu məqalə “Aqrar istehsalı stimullaşdıran emal müəssisəsi” başlığı ilə dərc edilmişdir. Aidiyyatı məqalə aşağıda diqqətinizə çatdırılır.
“Qafqaz Konserv Zavodu” MMC-nin istifadəyə verilməsindən 5 il ötür.
“Qafqaz Konserv Zavodu” MMC Azərbaycan xalqının ümummilli lideri Heydər Əliyevin birbaşa məsləhəti ilə Xaçmaz şəhərində inşa edilərək, 12 sentyabr 2003-cü il tarixində istifadəyə verilmişdir. Müxtəlif sahələrdə nailiyyətləri sıralayan zavod uzaqgörən siyasətin nəticəsi kimi etimadı doğrultmuşdur.
Bu gün “Qafqaz Konserv Zavodu” 135 çeşiddə məhsulları ilə Azərbaycanın konservləşdirilmiş mallara olan ehtiyacının əsas hissəsini təmin edir. Burada müasir texnologiya vasitəsilə tomat pastası, ət konservi, yaşıl noxud, mürəbbə, kompot, hazır yeməklər, turşu istehsal olunur. Məhsullar “Bizim Tarla”, “Final”, “Bostan”, “Super Sun” adları altında bazara təqdim olunur. Ölkənin ən müasir avadanlıqlarına sahib olan “Qafqaz Konserv Zavodu” MMC istehsal mərhələsində həyata keçirdiyi sistemli siyasətlə istehlakçıların etimadını qazanmışdır.
Ölkəmizin dinamik iqtisadi inkişafının əsas göstəricisi olan emal müəssisələrinin yüksək səviyyəli fəaliyyəti dövlətimizin daima diqqət mərkəzindədir. “Qafqaz Konserv Zavodu” da “Regionların sosial-iqtisadi inkişafı Dövlət Proqramı” çərçivəsində bir sıra işlər görməkdədir. Konserv zavodunun fəaliyyətə başlaması şimal bölgəsinə böyük dəstək olmuşdur. Belə ki, zavod 350 nəfər işçi çalışdırmaqla bölgədə olan işsizliyin aradan qaldırılmasına öz töhfəsini vermişdir. Həmçinin “Qafqaz Konserv Zavodu” öz nümunəvi fəaliyyəti ilə şimal bölgəsində zəhmətsevər xalqın dayağına çevrilmişdir.
Belə ki, zavod istehsal müəssisəsi olduğu üçün meyvə-tərəvəz məhsullarının bir hissəsini yerli əhalidən alır. Sakinlər özlərinin torpaq sahələrində becərdikləri meyvə-tərəvəz məhsullarını vaxtında zavoda təhvil verərək zəhmətlərinin qarşılığını alırlar.
Hal-hazırda, müəssisədə bütün əməliyyatlar İSO-9001:2000 standartlarına uyğun aparılır. “Qafqaz Konserv Zavodu” məhsullarının keyfiyyətinə xüsusi diqqət yetirməkdədir. Bununla yanaşı, zavod müasir texnologiyalar, yeni elmi tədqiqatların nəticələrinin dəyərləndirilməsi və müştərilərin arzu-istəklərinə əsaslanıb daim yeniliklər etməkdədir.
“Qafqaz Konserv Zavodu” MMC 2003-cü ildən bəri nümunəvi əkin sahələri yaradır. Mütəmadi olaraq bu illər ərzində tələbata uyğun olaraq pomidor, xiyar, badımcan, qırmızı bibər, sarı pomidor əkinləri həyata keçirilmişdir.
Azərbaycanda ilk dəfə olaraq yaşıl noxud əkini, məhz zavodun nümunəvi əkin sahəsində həyata keçirilmişdir.
Artıq Azərbaycanda ilk dəfə yaşıl noxud becərilməsi və istehsalını gerçəkləşdirən “Qafqaz Konserv Zavodu” MMC-nin adı tarixə qızıl hərflərlə yazılmışdır.
“Qafqaz Konserv Zavodu”-nun məhsulları mütəmadi olaraq ölkəmizdə və xaricdə keçirilən sərgilərdə nümayiş etdirilir. Sərgilərdə maraqla qarşılanan zavodun məhsulları istehlakçıların böyük rəğbətini qazanır. İstehsal olunan məhsulların yüksək keyfiyyətə malik olduğu vurğulanır və xüsusi qeyd edilir.
Müəssisə işçilərin təcrübələrinin artırılması üçün müxtəlif mövzuları əhatə edən tədris layihələri də həyata keçirir. Bu iş təcrübəli mütəxəssislər tərəfindən təşkil edilir.
“Qafqaz Konserv Zavodu” öz nümunəvi fəaliyyəti ilə müştərilərin müəssisəyə olan inamını daha da artıracaq, konservləşdirmə sahəsində yenilikçi adını təsdiqləyəcəkdir”.
Developed and Supported by